Iam Romani potentes esse coeperunt. Bellum enim in
centesimo et tricesimo fere miliario ab urbe apud Samnitas gerebatur, qui medii sunt inter Picenum, Campaniam et Apuliam. L.
Papirius Cursor cum honore dictatoris ad id bellum profectus est. Qui cum Romam rediret, Q. Fabio Maximo, magistro equitum,
quem apud exercitum reliquit, praecepit, ne se absente pugnaret. Ille occasione reperta felicissime dimicavit et Samnitas
delevit. Ob quam rem a dictatore capitis damnatus, quod se vetante pugnasset, ingenti favore militum et populi liberatus est
tanta Papirio seditione commota, ut paene ipse interficeretur.
- Latino
- Breviarium ab Urbe condita di Flavio Eutropio
- Eutropio
