Cassiopea, Aethiopum regina, Cephei uxor, ob pulchritudinem suam magnam arrogantiam sumpserat et saepe se marinis Nymphis aequabat; quare Nereides iratae Neptunum rogaverunt ut reginae superbiam puniret. Tum aquarum deus in Aethiopiam immanem draconem misit ut totam oram maritimam vastaret incolasque vexaret; et sic evenit. Quoniam iam multi homines a dracone devorati erant, populus desperatus regi suasit ut oraculum consuleret. Apollînis sacerdos sic respondit: «Nereidum ira placabitur et populus a dracone liberabitur, si Andromeda, regis filia, pro victima monstro oblata erit». Itaque populus a rege, ob filiae amorem haesitante, petivit ut virgo ad scopulum in litore ligaretur et monstro offerretur. Iam draco e mari exierat et miseram puellam devoraturus erat, cum Perseus pervenit ut eam liberaret. Clarus heros, pulchritudine Andromedae captus, sic patri matrique dixit: «Ego filiam vestram liberabo, si a vobis impetravero ut eam uxorem ducam». Parentes non solum matrimonium sed etiam regnum Perseo promiserunt: tum heros diu cum dracone luctatus est sed denique eum
interfecit atque Andromedam liberavit.
- Latino
- Maiorum Lingua A
- Versioni dai Libri di Esercizi
