Igitur in Bactrianorum regione, quae Artabazo tradita erat, sarcinas et impedimenta cum praesidio relinquit. Alexander cum expedito agmine loca deserta Sogdianorum intrat et nocturno itinere copias ducit: aquarum penuria non solum desperatione sed etiam desiderio aquae sitim accendit. Per CCCC stadia ne modicus quidem humor existit. Harenas vapor aestivi solis accendit quae flagrabant et velut incendio cuncta torrentur. Caligo deinde, quae immodico terrae fervore excitata est, lucem tegit, camporumque non alia qua vasti et profundi aequoris species est. Nocturnum iter tolerandum erat; nam rore et matutino frigore corpora levabantur. Ceterum cum solis luce calor oritur absorbetque humorem siccitas; ora visceraque penitus uruntur. Itaque primum animi, deinde corpora deficiebant. Pauci qui a peritis regionis admoniti sunt, praeparaverunt aquam, quae paulisper repressit sitim; deinde calore rursus desiderium humoris accensum est. Ergo vinum oleumque quae milites secum habebant ingerebantur; tantaque dulcedine potionis in posterum sitis non timebatur.
- Latino
- Lingua Magistra 1
- Versioni dai Libri di Esercizi
