Adulteria quidem exercuisse ne amici quidem negant, qui excusant ea sane non libidine, sed ratione commissa esse, quo facilius consilia adversariorum per mulieres exquireret. M. Antonius super festinatas Liviae nuptias obiecit et feminam consularem e triclinio viri coram in cubiculum abductam esse, rursus in convivium rubentibus auriculis incomptiore capillo reductam;1dimissam1Scriboniam, quia liberius doluerat nimiam potentiam paelicis; condiciones quaesitas1per amicos, qui matres familias et adultas aetate virgines denudabant atque perspiciebant. Scribit etiam ad Augustum haec2familiariter adhuc necdum plane inimicus aut hostis: «Quid te mutavit? Quod cum regina me coniungo? Uxor mea est. Nunc coepi3an abhinc annos novem? Tu deinde sola cum Drusilla te coniungis? Ita valeas, ut tu, epistulam cum leges, non te coniunxeris cum Tertulla aut Terentilla aut Rufilla aut Salvia Titisenia aut omnibus».
- Latino
- Lingua Magistra 1
- Versioni dai Libri di Esercizi
