Spatium urbis in regiones vicosque divisit instituitque ut illas annui magistratus sortito tuerentur, vicos magistri qui e plebe omnis viciniae legebantur. Adversus incendia excubias nocturnas vigilesque commentus est; ut coercerentur inundationes alveum Tiberis laxavit ac repurgavit quia completus erat olim ruderibus et aedificiorum prolationibus coartatus. Quo autem facilius undique urbs adiretur, desumpsit sibi Flaminiam viam Arimino tenus ut muniretur, reliquas triumphalibus viris ex manubiali pecunia ut sternerentur distribuit. Cum aedes sacrae vetustate conlapsae aut incendio absumptae essent, eas refecit et opulentissimis donis adornavit, ut in cellam Capitolini Iovis sedecim milia pondo auri gemmasque ac margaritas quingenties sestertium una donatione contulerit.
- Latino
- Lingua Magistra 1
- Versioni dai Libri di Esercizi