Gli spettacoli e i giochi

Spectaculorum et assiduitate et varietate et magnificentia omnes antecessit. Fecisse se ludos dicit suo nomine quater, pro aliis magistratibus, qui aut aberant aut non sufficiebant, ter et vicies. Fecitque nonnumquam etiam vicatim ac pluribus scaenis per omnium linguarum histriones, munera non in Foro modo, nec in amphitheatro, sed et in Circo et in Saeptis, et aliquando nihil praeter venationem edidit; athletas quoque cum exstructi essent in campo Martio sediles lignei; item navale proelium circa Tiberim cum cavatum esset solum, in quo nunc Caesarum nemus est. Quibus diebus custodes in urbe disposuit, ne raritate civium grassatoribus obnoxia esset. In Circo aurigas cursoresque et confectores ferarum, et nonnumquam ex nobilissima iuventute, produxit. Sed et Troiae lusum edidit frequentissime maiorum minorumque puerorum, cum prisci decorique moris clarae stirpis indolem sic notescére existimaret.