Celsioris staturae et candidi paene Galli sunt omnes et rutili, luminumque torvitate terribiles, avidi iurgiorum et sublatius insolentes. Metuendae voces conplurium et minaces placatorum iuxta et irascentium, tersi tamen pari diligentia cuncti et mundi, nec in tractibus illis maximeque apud Aquitanos poterit aliquis videri vel femina licet perquam pauper ut alibi frustis squalere pannorum. Ad militandum omnis aetas aptissima et pari pectoris robore senex ad procinctum ducitur et adultus gelu duratis artubus et labore adsiduo multa contempturus et formidanda. Vini avidum genus, adfectans ad vini similitudinem multiplices potus: et inter eos humiles quidam obtunsis ebrietate continua sensibus raptantur discursibus vagis.
- Latino
- Versioni Latinum Vertere
- Versioni dai Libri di Esercizi
