Postquam Augustus decesserat, Divus appellatus est. Rem publicam beatissimam Tiberio successori reliquit, qui privignus ei, mox gener, postremo adoptione filius fuerat. Tiberius ingenti socordià imperium gessit, gravi crudelitate, scelestà avaritià, turpi libidine. Nam nusquam pugnavit, bella per legatos gessit suos. Quosdam1reges ad se per blanditias evocavit numquamque remisit, in quibus Archelaum Cappadocem, cuius etiam regnum in provinciae formam redegit et maximam civitatem appellari nomine suo iussit,2quae nunc Caesarea dicitur et Mazaca antea vocabatur. Tertio et vicesimo imperii anno, aetatis septuagesimo octavo, ingenti omnium gaudio decessit in Campania.
- Latino
- Lingua Magistra 1
- Versioni dai Libri di Esercizi
