Lupus et agnus, siti compulsi, ad eundem venerant rivum. Lupus loco superiore stabat, agnus loco multo inferiore. Ille, fauce improba incitatus, hunc necare volebat; quare causam iurgii intulit falsis accusationibus. Primum his verbis agnum accusavit: “Turbulentam facis mihi bibenti aquam”; cui agnus respondit: “Hoc possibile non est, quod aqua decurrit a te ad me”. Deinde lupus: “Sex mensibus ante” inquit “mihi maledixisti”; et agnus: “Sex mensibus ante natus non eram”. Denique lupus: “Pater hercle tuus mihi maledixit”, atque agnum correptum iniusta laceravit nece. Qui fictis causis innocentes opprimunt, in hac fabula maximum suae improbitatis exemplum inveniunt.
- Latino
- Versioni Latinum Vertere
- Versioni dai Libri di Esercizi