Pater Tiberi, Nero, quaestor C. Caesaris Alexandrino bello classi praepositus est et plurimum ad victoriam contulit. Quare et pontifex in locum P. Scipionis substitutus est et in Galliam missus est ubi colonias deduxit. Tamen post Caesaris necem etiam praemia tyrannicidis proposuit. Praetura deinde peracta, cum L. Antonio consule, triumviri fratre, ad Perusiam venit: deditionem ceteri fecerunt, at Nero solus permansit in partibus ac primo Praeneste, inde Neapolim evasit servosque ad pilleum frustra vocavit, inde in Siciliam profugit. Sed statim ad M. Antonium traiecit in Achaiam. Tunc reconciliata inter omnes pax est et ille cum Antonio Romam remeavit uxoremque Liviam Drusillam et tunc gravidam Augusto, qui eam petiverat, concessit. Paulo post mortem occubuit.
- Latino
- Lingua Magistra 1
- Versioni dai Libri di Esercizi
