Numquam adhuc Romanae copiae in unum neque maiores neque melioribus ducibus convenerant, totum terrarum orbem facile subacturae, si contra barbaros ducerentur. Pugnatum est ingenti intentione victusque ad postremum Pompeius est et castra eius direpta sunt. Ipse fugatus Alexandriam petiit, ut a rege Aegypti, cui tutor a senatus datus fuerat, propter iuvenilem eius aetatem, acciperet auxilia. Qui, fortunam magis quam amicitiam secutus occidit Pompeium, caputque eius et anulum Caesari misit. Quo conspecto, Caesar etiam lacrimas fudisse dicitur, tanti viri intuens caput et generi quondam sui.
- Latino
- Versioni Latinum Vertere
- Versioni dai Libri di Esercizi
