C. Plinius Cornelio Tacito suo s. Ridebis, et licet rideas. Ego, ille quem nosti, apros tres et quidem pulcherrimos cepi. “Tu?” dicis. Ego; non tamen ut omnino ab inertia mea et quiete discederem. Ad retia sedebam; erat in proximo non venabulum aut lancea, sed stilus et pugillares; meditabar enotabamque, ut si manus vacuas, plenas tamen ceras reportarem. Non est quod contemnas id studii genus; mirum est ut animus agitatione motuque corporis excitetur; iam undique silvae et solitudo illudque silentium quod venationi datur, magna cogitationis incitamenta sunt. Proinde cum venaberis, licebit auctore me ut panarium et lagunculam sic etiam pugillares ducas: experieris non Dianam magis montibus quam Minervam inerrare. Vale.
- Latino
- Lingua Magistra 1
- Versioni dai Libri di Esercizi
