Ubi Ariovistum castris se tenère Caesar intellexit, ne diutius commeatu prohiberetur, ultra eum locum quo in loco Germani consederant, circiter passus sescentos ab eis, castris idoneum locum delegit acieque triplici ad eum locum venit. Primam et secundam aciem in armis esse, tertiam castra munire iussit. Is locus ab hoste circiter passus sescentos, uti dictum est, aberat. Eo circiter hominum sedecim milia expedita cum omni equitatu Ariovistus misit, quae copiae nostros terrerent et munitione prohiberent. Caesar, ut ante constituerat, duas acies hostem propulsare, tertiam opus perficére iussit. Munitis castris duas ibi legiones reliquit et partem auxiliorum, quattuor reliquas legiones in castra maiora reduxit.
- Latino
- Lingua Magistra 1
- Versioni dai Libri di Esercizi
