Hannibal, noctu Carthagine egressus, postero die ad urbem Thapsum pervenit. Ibi eum parata instructaque remigio accepit navis, qua ex Africa excessit, saepius patriam quam fortunam suam miseratus. Eodem die, cum Cercinam in parvam insulam traiecisset ibique in portu naves Phoenicum invenisset, veritus ne inde profectae Thapsum vel Hadrumetum nuntiarent ipsum Cercinae esse, quam celerrime potuit ancoras solvit et prospero cursu Tyrum appulit, ubi a conditoribus Carthaginis benigne exceptus est. Tyro ad Antiochiam profectus, cum eo pervenisset audissetque iam regem Antiochum in Asiam confugisse, comiter a regis filio exceptus, nullam interposuit moram quin Ephesum proficisceretur, ut ibi regem convenire posset. Ephesi enim eum convenit fluctuantem adhuc animo incertumque de bello in Romanos.
- Latino
- Maiorum Lingua C
- Versioni dai Libri di Esercizi
