Caesar Kalendis Ianuariis ab oppido Ruspina movit et post aliquot dies pervenit ad oppidum Leptim, liberam civitatem et immunem. Quidam ex oppido obviam Caesari venerunt, ab eo petiverunt ne qui damni cives acciperent atque libenter se omnia eius imperata facturos esse promiserunt. Itaque Caesar, centurionibus et custodiis impositis ad portas oppidi, ne qui miles in oppidum introiret aut iniuriam faceret incuipiam incolae, non longe ab oppido apud litus castra posuit. Eodem naves onerariae et longe nonnullae aliquo casu advenerunt. Caesar omnes equites in navibus continuit ne agri vastarentur; aquam in naves comportari iussit. Sed remiges, qui aquatum e navibus exierant, subito equites Mauri petiverunt, multos iaculis vulneraverunt, aliquos interfecerunt. Caesar interim in Sardiniam et in reliquas provincias finitimas nuntios cum litteris dimisit, ut sine ulla mora sibi auxilia, commeatus, frumentum mitterentur. C. Sallustium Crispum praetorem ad Cercinam insulam, quam adversarii tenebant, cum partem navium ire iussit, quod ibi magnam copiam frumenti esse audiebat.
- Latino
- Maiorum Lingua B
- Versioni dai Libri di Esercizi
