Caesar, cum per exploratores certior factus esset Germanos auxilia Gallis misisse, Rhenum transire et exercitum in Germanorum fines transportare constituit. Postquam ad ripam fluminis pervenit, milites castra locare iussit. Treveri et Menapii, regionis accolae, aliquas naves habebant, quibus milites transportari poterant, sed Caesar, quoniam utrique populo diffidebat, ripas fluminis ponte iungere constituit. Statim ligna et quodcumque ad opus necessarium erat comportari iussit atque unicuique militum aliquid mandavit. Opere brevi tempo effecto, Caesar exercitum trans Rhenum traduxit et ad utramque partem pontis firmo praesidio relicto in fines Sugambrorum contendit. Interim a compluribus civitatibus ad eum legati venerunt ut pacem peterent. Cum autem audivisset Suebos, gentem omnium Germanorum bellicosissimam, se in silvis abdidisse, vicos agrosque eorum ferro ignique vastavit. Postea, diebus XVIII trans Rhenum consumptis, legiones in Galliam reduxit pontemque rescindi iussit.
- Latino
- Maiorum Lingua B
- Versioni dai Libri di Esercizi
