Si vos valetis, nos valemus. Vestrum iam consilium est, non solum meum, quid sit vobis faciendum. Si Caesar Romam modeste venturus est, recte in praesentia domi esse potestis; sin homo amens diripiendam urbem daturus est, vereor ut Dolabella ipse satis nobis prodesse possit. Etiam illud metuo, ne iam intercludamur, ut, cum velitis exire, non liceat. Reliquum est quod consideretis vestri similes feminae maneantne Romae; si enim non manent, videndum est ut honeste vos esse possitis. Quoquo modo quidem nunc se res habet, modo ut hunc nobis statum tenere liceat, bellissime vel mecum vel in nostris praediis esse poteritis. Etiam illud verendum est, ne brevi tempore fames in urbe sit. His de rebus velim cum Pomponio, cum Camillo, cum amicis vestris, consideretis. Ad summam animo forti sitis. Vos, meae carissimae animae, quam saepissime ad me scribite et vos quid agatis et quid istic agatur. Valete.
- Latino
- Lingua Viva 2
- Versioni dai Libri di Esercizi
