Clelia

Porsena Etruscorum rex Romam obsidione cingebat. Etruscorum castra in Tiberis fluminis ripis posita erant ibique aliquot nobiles puellae Romanae obsides detinebantur. Inter obsides erat Cloelia virgo pulchra et animosa quae libertatem cupiebat et continenter comites ad fugam incitabat. Quare olim cum puellarum agmine vigilias eludit et clam ex Etruscorum castris fugit. Postea magno cum animo Cloelia comites ad flumen ducit et inter tela hostium audacter Tiberim prima tranat. Denique Romam cum aliis puellis pervenit ubi patribus matribusque filias reddit. Sed senatores Porsenae regis iram timebant quia inter Romanos Etruscosque foedus erat. Nam Porsena per legatos Cloeliam deposcit: Romani foedera observant et statim virginem regi restituunt. Cloelia ad Etruscorum castra redit sed Porsena magna puellae audacia commotus eam liberat et Romam remittit. Postea Romani in via Sacra animosae virginis statuam posuerunt.