Salsura pernarum ofellae Puteolanae. Pernae salliantur in dolio aut in seria. Cum pernas emeris, ungulas earum praecidito. Salis Romaniensis moliti in singulas semodios ponito. Oportet in fundo dolii aut seriae salem sterni, deinde pernam poni, sale obrui totam. Deinde alteram pernam insuper ponito, eodem modo obtruito. Caveto ne caro carnem tangat. Ita omnes pernae obruantur. Ubi iam omnes composueris, sale insuper obrue, ne caro appareat. Ubi iam dies quinque in sale fuerint, cura ut omnes pernas eximas cum sale. Quae tum summae fuerint, imas facito eodemque modo sale obruito et componito. Post dies omnino XII necesse erit pernas eximi et salem omnem detergi et suspendi in vento biduum. Die tertio, cum pernae extersae sint spongea bene, perunguantur oleo, suspendantur in fumo biduum. Tertio die eas demito, perunguito oleo et aceto commixto, suspendito in carnario. Nec tinia nec vermes tangent.
- Latino
- Lingua Viva 1
- Versioni dai Libri di Esercizi
