Nullum adeo necessitudinis genus est, quod Nero non scelere perculit. Antoniam Claudi filiam,recusantem post Poppaeae mortem nuptias suas, quasi molitricem novarum rerum interemit; similiter ceteros aut affinitate sibi aut propinquitate coniunctos;in quibus Aulum Plautium iuvenem, quem cum ante mortem per vim conspurcavisset: «Veniat nunc» inquit«mater mea et successorem meum osculetur» iactans dilectum esse ab ea et ad spem imperii impulsum (esse). Privignum Rufium Crispinum Poppaea natum, impuberem adhuc, ut mergeretur mari, dum piscaretur, servis ipsius demandavit. Tuscum nutricis filium relegavit, quod in procuratione Aegypti in balineis in adventum suum exstructis laverat. Senecam praeceptorem ad necem compulit, cum saepe commeatum petenti bonisque cedenti persancte iurasset suspectum esse se frustra et periturum potius quam nociturum ei.Burro praefecto remedium ad fauces pollicitus toxicum misit. Libertos divites et senes, olim adoptionis mox dominationis suae fautores atque rectores, veneno, partim cibis, partim potionibus indito, intercepit.
- Latino
- Lingua Magistra 2
- Versioni dai Libri di Esercizi
