Circa Darei quadrigas iacebant nobiles duces, ante oculos regis interfecti; omnes proni, sicut procubuerant dimicantes. Iamque, Darei equi, confossi hastis et dolore efferati, iugum quatere et regem quadrigis excutere incipiebant. Dareus, ne vivus in hostium potestatem veniret, desiluit et in equum proximum ascendit; deinde imperii insignia indecore abiecit ne fugiens agnosceretur. Tum vero omnes milites, perterriti, arma iecerunt et iter intenderunt vel ad Persidem vel ad montium fauces occultas ut fuga salutem peterent; pauci ad Darei castra contenderunt. Sed iam castra ab hoste victore occupata erant; ingens auri argentique pondus a militibus direptum erat. Darei tabernaculum solum intactum ei omiserant ut ex more victor victi regis tabernacolo exciperetur.
- Latino
- La Lingua delle Radici 1
- Versioni dai Libri di Esercizi
