Cum dies hibernorum complures transissent frumentumque Galba comportari iussisset, subito per exploratores nuntiatum est ex ea parte vici, quam Gallis concesserat, omnes noctu discessisse montesque qui impenderent a maxima moltitudine Sedunorum et Veragrorum teneri. Id compluribus causis acciderat, ut subito Galli belli renovandi legionisque opprimendae consilium caperent: primum, quod legionem, detractis cohortibus duabus et compluribus militibus absentibus, qui singillatim commeatus petendi causa missi erant, propter paucitatem hostes despiciebant; tum etiam quod propter iniquitatem loci, cum ipsi ex montibus in vallem decurrerent et tela conicerent, ne primum quidem posse impetum suum sustineri existimabant. Accedebat quod suos ab se liberos abstractos obsidum nomine dolebant, et Romanos non solum itinerum causa, sed etiam perpetuae possessionis culmina Alpium occupare conari et ea loca finitimae provinciae adiungere sibi persuasum habebant.
- Latino
- Lingua Viva 2
- Versioni dai Libri di Esercizi
