Esempi di schiavi fedeli ed eroici

C. Gracchus, ne in potestatem perveniret inimicorum, qui eum comprehensuri erant, Philocrati servo suo cervices praebuit ut inciderentur. Quas cum ille celeri ictu abscidisset, gladium cruore domini manantem per sua egit praecordia. Euporum alii hunc vocitatum esse existimant: ego de nomine non disputaturus sum, famularis tantum modo fidei robur admiror.
Cum C. Plotius Plancus, a triumviris proscriptus, in regione Salernitana lateret, delicatiore vitae genere et odore unguenti occultam salutis custodiam detexit: istis enim vestigiis eorum, qui miseros persequebantur, sagax inducta cura abditum fugae cubile odorata est. A quibus comprehensi servi latentis multumque ac diu torti negabant se scire ubi dominus esset, sed ita morituri erant. Non sustinuit deinde Plancus tam fideles tamque boni exempli servos ulterius cruciari, sed, ne illi trucidarentur, processit in medium iugulumque gladiis militum obiecit. Quod certamen mutuae benevolentiae ostendit et dignitatem domini, qui tam constantem servorum fidem expertus est, et fidem servorum, qui tam iusta domini misericordia quaestionis saevitia liberati sunt.