Cyrus, cum Babylona oppugnaturus festinaret, Gynden, amnem late fusum, vado transire temptavit, quod vix tutum est etiam cum ad minimum aestate deductum est. Ibi unus ex equis albis, qui trahêre regium currum solebant, abreptus a flumine vehementer commovit regem, qui iuravit se amnem illum regis comitatum auferentem eo redacturum, qui transiri calcarique etiam a feminis posset. Huc deinde omnem transtulit belli apparatum et tam diu assedit operi, donec centum et octoginta cuniculis divisum alveum in trecentos et sexaginta rivos dispergeret ac siccum relinqueret. Periit itaque et tempus, magna in magnis rebus iactura, et militum ardor, quem ille inutilis labor fregit, et occasio aggrediendi imparatos hostes, dum rex bellum indictum hosti cum flumine gerit.
- Latino
- Maiorum Lingua C
- Versioni dai Libri di Esercizi
