Officia non eadem disparibus aetatibus tribuuntur aliaque sunt iuvenum, alia seniorum: itaque aliquid de hac distinctione dicendum est. Est igitur adulescentis maiores natu vereri exque iis deligere optimos et probatissimos, quorum consilio atque auctoritate nitatur; ineuntis enim aetatis inscitia senum prudentia constituenda et regenda est. Maxime autem haec aetas a libidinibus arcenda est exercendaque in labore patientiaque et animi et corporis, ut eorum et in bellicis et in civilibus officiis vigeat industria. Atque id etiam omnium nostrum interest: cum iuvenes relaxare animos et dare se iucunditati volent, caveant intemperantiam, meminerint verecundiae, et id facilius erit, si in eiusmodi quidem rebus maiores natu nolent interesse.
- Latino
- Lingua Viva 2
- Versioni dai Libri di Esercizi
