Postero die Caesar promota turri perfectisque omnibus operibus quae facere instituerat, magno coorto imbre, hanc tempestatem utilissimam ad capiendum consilium arbitratus est, quod paulo incautius nonnullas custodias in muro dispositas videbat, suosque languidius in opere versari iussit et quid agi optaret ostendit. Legionibusque intra vineas in occulto expeditis, cohortatus ut aliquando pro tantis laboribus fructum victoriae perciperent, iis quicumque primi murum ascendissent praemia proposuit militibusque signum dedit. Illi subito quacumque parte evolaverunt murumque celeriter compleverunt.
- Latino
- Lingua Viva 2
- Versioni dai Libri di Esercizi
