I romani non vogliono vincere con l'inganno, ma con il valore

Contra Pyrrum, Epiri regem, a senatu Romano missus est consul Fabricius, quem rex, virtutem eius admiratus, secreto invitavit ut patriam desereret, quartam partem regni sui pollicitus; sed ne hoc dono quidem corrumpi potuit. Tum, cum vicina castra ipse et Pyrrus haberent, medicus regis noctu ad eum venit promittens veneno se Pyrrum occisurum esse, si quod munus sibi polliceretur. His verbis auditis, Fabricius medicum vinctum reduci iussit ad dominum referrique Pyrro iussit verba quae contra vitam eius a medico dicta sunt, ut omnibus manifestum esset Romanos virtute, non fraude, vincere solere. Tum regem admiratum dixisse tradunt: «Ille est Fabricius, qui difficilius ab honestate quam sol a cursu suo averti potest!». Tum rex ad Siciliam profectus est, ubi, M. Curio Dentato et Cornelio Lentulo consulibus, contra Romanos strenue pugnavit; postremo, a Curio Dentato profligatus, Tarentum petit, unde in Graeciam rediit.