Alexander Bactrianorum regionem Artabazo tradidit, ibi cum praesidio sarcinas impedimentaque relinquens. Deinde cum expedito agmine loca deserta Sogdianorum intravit, nocturno itinere copias ducens. Per multa stadia ne modicus quidem humor existebat: milites siti ardebant. Harenas autem fervens aestivi solis vapor accendebat; caligo immodico terrae fervore excitata lucem tegebat; tellus vastum et torridum aequor apparebat. Itaque militibus solum nocturnum iter tolerabile erat, quia rore nocturno corpora debilia levabantur; ceterum calor cum luce proveniens omnem naturalem humorem siccabat; ora visceraque penitus urebantur. Quare brevi tempore primum militum animi, deinde corpora deficere coeperunt.
- Latino
- La Lingua delle Radici 1
- Versioni dai Libri di Esercizi
