Cum Liber pater ad homines descendisset ut eis vinum, suavem atque iucundum potum, praeberet, ad Icarium et Erigonen in hospitium liberale devenit. Iis utrem plenum vini donavit, ut in reliquas terras vinum propagare possent. Icarius, cum plaustrum oneravisset, cum Erigone filia et cane Maera in terram Atticam ad pastores devenit et vini suavitatem ostendit. Sed pastores, cum immoderate bibissent, ebrii conciderunt; postea, existimantes Icarii donum malum medicamentum, fustibus eum interfecerunt. Canis autem Maera ululans Erigonen duxit ad locum ubi pater insepultus iacebat; at virgo, eo cum venisset, super corpus parentis in arbore suspendio se necavit.
- Latino
- La Lingua delle Radici 1
- Versioni dai Libri di Esercizi