Bactrianae multiplex et varia natura est. Loca sunt ubi plurimae arbores et vites largos fructus alunt et solum pingue crebri fontes rigant; ubi sola mitiora sunt, agricolae frumentum conserunt, cetera armentorum pabulo cedunt. Sed magnam partem Bactrianae terrae steriles arenae tenent; squalida siccitate regio non hominem, non frugem alit. Cum vero venti a Pontico mari spirant, sabulum cumulant omniaque pristini itineris vestigia delent. Itaque viatores sidera observant et propemodum clarior tutiorque est noctis umbra quam lux: nam interdiu invia est regio, quia nec vestigium inveniunt et nitorem siderum caligo obscondit. Ceterum, cum viatores fortissimus ventus deprehendit, arena obruit. Sed ubi terra est, ingens hominum equorumque multitudo vivit.
- Latino
- Lingua Viva 1
- Versioni dai Libri di Esercizi
