La carriera di un centurione.

«Sp. Ligusticus sum; pater meus mihi iugerum agri reliquit et parvum tugurium, in quo adhuc habito. Miles sum factus P. Sulpicio C. Aurelio consulibus. In eo exercitu, qui in Macedoniam est transportatus, biennium miles gregarius fui adversus Philippum regem; tertio anno virtutis causa mihi T. Quinctius Flamininus decimum ordinem hastatum adsignavit. Devicto Philippo Macedonibusque, dimittendus fui, at continuo miles voluntarius cum M. Porcio consule in Hispaniam sum profectus. Hic me imperator dignum iudicavit, cui primum hastatum prioris centuriae adsignaret. Tertio iterum voluntarius miles fui in exercitu, qui ad Aetolos subiciendos est missus. Subactis Aetolis, num in Italiam dux nos reportaturus esset scire cupiebamus et ita evenit; deinceps bis in Hispania mihi militandum fuit, semel Q. Fulvio Flacco, iterum Ti. Sempronio Graccho praetore. A Flacco inter ceteros, quos virtutis causa secum ex provincia Romam ad triumphandum deducebat, deductus sum. Quater intra paucos annos primum pilum duxi; quater et tricies virtutis causa dona ab imperatoribus recepi; sex civicas coronas accepi. Viginti duo stipendia annua in exercitu emerui, et maior annis sum quinquaginta.»