Graeci in quadrato amplis et duplicibus porticibus fora constituunt crebrisque columnis et lapideis aut marmoreis epistyliis adornant et supra ambulationes in contignationibus faciunt. In Italiae vero urbibus alia ratione fora aedificantur, nam a maioribus consuetudo tradita est secundum quam gladiatoria munera in foro dantur. Igitur circum spectacula spatiosiora intercolumnia distribuentur circaque argentariae tabernae et maeniana superioribus coaxationibus conlocabuntur; quae et ad usum publicum et ad vectigalia disponentur. Fororum magnitudines autem ad copiam hominum computabuntur, nam spatium nec parvum erit nec propter inopiam populi vastum forum apparebit. Erit oblonga fori forma et ad spectaculorum rationem idonea dispositio.
- Latino
- Lingua Viva 1
- Versioni dai Libri di Esercizi
