Scytharum pietatis libenter testimonium reddo. Cum Dareus, Persarum rex, cum ingenti exercitu eorum regionem invasisset, Scythae, proelium detrectando atque paulatim recedendo usque ad ultimas regionis partes, nullam occasionem decertandi hostibus dabant. Interrogati deinde a rege per legatos quando finem fugiendi aut quando initium pugnandi facturi essent, Scythae responderunt se nec urbes ullas nec agros cultos, pro quibus dimicarent, habere: nunc tamen, cum ipsi in regionem illam pervenissent, ubi maiorum et parentum monumenta erant, Dareum sciturum quemadmodum Scythae proeliari solerent. Quo responso illa immanis et barbara gens ab omni feritatis crimine se redemit. Prima enim et optima pietatis magistra natura est, quae nullo usu litterarum indîgens, propriis ac tacitis viribus, pietatem erga parentes liberosque pectoribus omnium hominum infundit.
- Latino
- Maiorum Lingua B
- Versioni dai Libri di Esercizi
