Lavinia

Rex Latinus in Latio regnans, Amatam in matrimonium duxerat et filiam pulcherrimam genuerat, cui nomen Lavinia fuit. Cum puella adolevisset, Amata Turno, Rutulorum regi, filiam despondit et tempus sollemnibus nuptiis cum eo constituit. Sed, cum in Latium venit Turnus, repentino portento matrimonium impeditum est, quia fata imperaverant ut Lavinia externo duci nuberet. Nam flammae comas et coronam gemmatam, quam virgo capite ferebat, repente incenderunt, neque tamen vultum eius laeserunt. Cum prodigium omnium animos perterruisset, Latinus in proximam silvam processit, ubi erat sollemne altare, ut deos de nuptiis consuleret, quae interruptae erant. Ii per haruspicem responderunt filiam eius advenae uxorem futuram esse.