Le prime biblioteche pubbliche

Rerum scriptores meminerunt Athenis Pisistratum tyrannum libros publice ad legendum primum praebere coepisse. Deinceps studiosius accuratiusque ipsi Athenienses libros auxerunt, quorum numerus ingentissimus factus est; sed omnem illam postea librorum copiam Xerxes, Athenarum potitus, urbe ipsa praeter arcem incensa, abstulit asportavitque in Persas. Ii porro libri universi multis post tempestatibus Seleucus rex, qui Nicator appellatus est, ut Athenas referrentur curavit. Ingens postea numerus librorum in Aegypto ab Ptolemaeis regibus vel conquisitus vel confectus est ad milia ferme voluminum septingenta; sed ea omnia bello Alexandrino, dum labefit ea civitas, non sponte neque opera consulta, sed a militibus auxiliariis forte incensa sunt.