Veteres poetae de felici aurea aetate mirabilia scripserunt. Antiquo tempore non erant anni tempora, sed ver perenne omnia animantia delectabat. Viridia prata multitudine florum ornata erant, arbores varia et dulcia poma effundebant; amnes candidi lactis et flavi mellis fluebant. Quoniam natura omnia necessaria praebebat, homines non laborabant et sine curis laeti felicesque vivebant. Neque tempestatum vis neque marium et fluminum impetus neque caeli fulmina cognita erant. Quia inter animalia nullae inimicitiae erant, lupus et agnus una vivebant et ferae feroces teneros catulos non terrebant aut rapiebant. Nondum atrocia scelera, acria arma, tristia bella terram cruore polluebant. Omnium sententia in aurea aetate homines deis similes vivebant.
- Latino
- Lingua Viva 1
- Versioni dai Libri di Esercizi