Equus sedare solitus quo fuerat sitim, dum sese aper volutat
turbavit vadum. Hinc orta lis est. Sonipes, iratus fero, auxilium petiit hominis; quem dorso levans rediit ad hostem laetus.
Hunc telis eques postquam interfecit, sic locutus traditur: “Laetor tulisse auxilium me precibus tuis; nam praedam cepi et
didici quam sis utilis.” Atque ita coegit frenos invitum pati. Tum maestus ille: “Parvae vindictam rei dum quaero demens,
servitutem repperi.” Haec iracundos admonebit fabula inpune potius laedi quam dedi alteri.
- Latino
- Le Fabulae di Gaio Giulio Fedro
- Fedro