Ulpius Traianus tam iustus ac clemens fuit, ut in numero deorum relatus sit. Olim enim, cum imperator Romam relicturus esset ut bellum contra Dacos duceret cumque iam equum ascendisset ut exercitum recenseret, vidua quaedam, annis doloribusque confecta, ad pedes eius se proiecit et flens eum oravit ut mortem filii iniuste necati vindicaret. Traianus tum, cum Urbe exire festinaret, respondit: «Cum a bello rediero, ius tibi reddam». Sed vidua, circumiens imperatoris equum: «Nisi redieris, quis mihi ius reddet?». Traianus contra: «Si in bello periero, successor meus satisfaciet tibi». At illa: «Si alius mihi ius reddiderit, quem meritum habebis? Tu imperator es, tu mihi debitor es, te non liberabit iustitia aliena. Ne abieris, priusquam mihi ius reddideris!». Viduae verbis commotus Traianus ex equo descendit et, quamvis omnes eum admonerent ut viam pergeret, humilem viduam audivit et, rebus cognitis, ei ius reddidit.
- Latino
- Maiorum Lingua A
- Versioni dai Libri di Esercizi
