Mendacium neque dicebat neque pati poterat. Itaque eius comitas non sine
severitate erat neque gravitas sine facilitate ut difficile esset intellectu utrum eum amici magis vererentur an amarent.
Quidquid rogabatur religiose promittebat quod non liberalis sed levis arbitrabatur polliceri quod praestare non posset. Idem
in nitendo quod semel annuisset tanta erat cura ut non mandatam sed suam rem videretur agere. Numquam suscepti negotii eum
pertaesum est: suam enim existimationem in ea re agi putabat; qua nihil habebat carius. Quo fiebat ut omnia Ciceronum Catonis
Marci Q. Hortensii Auli Torquati multorum praeterea equitum Romanorum negotia procuraret. Ex quo iudicari poterat non inertia
sed iudicio fugisse rei publicae procurationem.
- Latino
- De viris illustribus (Atticus) di Cornelio Nepote
- Cornelio Nepote
