De pietate
autem Attici quid plura commemorem? Cum hoc ipsum vere gloriantem audierim in funere matris suae quam extulit annorum XC cum
esset VII et LX se numquam cum matre in gratiam redisse numquam cum sorore fuisse in simultate quam prope aequalem habebat.
Quod est signum aut nullam umquam inter eos querimoniam intercessisse aut hunc ea fuisse in suos indulgentia ut quos amare
deberet irasci eis nefas duceret. Neque id fecit natura solum quamquam omnes ei paremus sed etiam doctrina. Nam principum
philosophorum ita percepta habuit praecepta ut his ad vitam agendam non ad ostentationem uteretur.
- Latino
- De viris illustribus (Atticus) di Cornelio Nepote
- Cornelio Nepote
