Corpore traditur maculoso dispersis per pectus atque alvum genetivis notis in modum et ordinem ac numerum stellarum caelestis ursae sed et callis quibusdam ex prurigine corporis adsiduoque et vehementi strigilis usu plurifariam concretis ad impetiginis formam. Coxendice et femore et crure sinistro non perinde valebat ut saepe etiam in claudicaret; sed remedio harenarum atque harundinum confirmabatur. Dextrae quoque manus digitum salutarem tam imbecillum interdum sentiebat ut torpentem contractumque frigore vix cornei circuli supplemento scripturae admoveret. Questus est et de vesica cuius dolore calculis demum per urinam eiectis levabatur.
- Latino
- Divus Augustus
- Svetonio
