Romae, in mundi capite, cives saepe libenter per vias deambulabant, interdum cum uxoribus ac liberis suis iuvenibus, quia iucundum erat spectare novos vicos et magnificentissimas domus, atque laudare artificum singularem peritiam et mirum manuum usum. Post meridiem, circiter hora octava, via Appia in Palatinum veniebant, ubi olim habitabant pastores quibus plurimae oves erant, postea ad Suburam et Argiletum, ubi pauperes in miseris insulis infelici habitu vivebant sine ulla spe in melius mutationis. Apud forum spectabatur via Sacra, insignis quia ad Capitolium ducebat: ibi triumphi ab imperatoribus victoribus agebantur. Romae monumenta maxime cordi erant patribus qui saepe filiis dicebant: “Spectate templa ac deorum statuas! Videte tabernas et frequentia thermopolia!”. Interdum per vias raedis divites vehebantur, pauperes autem longa itinera semper pedibus faciebant.
- Latino
- Lingua Viva 1
- Versioni dai Libri di Esercizi
