Dum haec in Asia geruntur, interim in Sicilia Pyrrus, a Poenis navali proelio victus, ab Antigono, Macedoniae rege, supplementum militum per legatos petit, denuntians, sin aliter,revertere se in regnum necesse habere. Ubi repulsam legati renuntiaverunt, repentinam fingit profectionem Socios interim parare bellum iubet, arcis Tarentinae custodiam Heleno filio et amico Miloni tradens. Postquam in Epirum revertit, statim fines Macedoniae invadit; Antigonus cum exercitu occurrit victusque proelio in fugam vertitur. Atque ita Pyrrus Macedoniam in deditionem accepit et, cum damna amissae Siciliae Italiaeque pensavisset, relictum Tarenti filium et amicum arcessit. Antigonus autem cum paucis equitibus, fugae comitibus, Thessalonicam se recepit, inde bellum reparaturus cum Gallorum mercennaria manu. Rursus ab Ptolomaeo, Pyrri filio, funditus victus est; cum comitibus fugiens, salutis latebras ac fugae solitudines captat.
- Latino
- Lingua Magistra 2
- Versioni dai Libri di Esercizi
