Porsenna, Clusinorum rex, cum ingenti exercitu urbem Romam obsidebat. Cives Romani in magno periculo libertatem videbant. Non metu hostium, sed frumenti inopia Romani vexabantur; nam Etrusci omnes aditus obstruebant atque in urbem cibariorum introitum impediebant. Tunc C. Mucius, iuvenis nobilis et audax, consensu senatus, per hostium agmina penetravit et ad regis tribunal pervenit. Ibi tamen, propter errorem vestitus et ornatus, ictu pugionis non regem sed scribam necavit. Nec iuvenis propter infelicem exitum conatus et propter vultus minaces hostium tremuit, verum coram Porsenna ostendit contemptum cruciatuum et mortis. Itaque in igne manum dexteram posuit et flammae ardorem firmo animo toleravit. Admiratione motus Porsenna C. Mucium liberavit et postea audax iuvenis a Romanis valde honoratus est.
- Latino
- La Lingua delle Radici 1
- Versioni dai Libri di Esercizi
