Altero die Caesar, cum ad oppidum Senonum Vellaunodunum venisset, ne quem post se hostem relinqueret, quo expeditiore re frumentaria uteretur, oppugnare instituit idque biduo circumvallavit; tertio die, missis ex oppido legatis de deditione, arma conferri, iumenta produci, sescentos obsides dari iubet. Ea qui conficeret, Gaium Trebonium legatum relinquit; ipse, ut quam primum iter conficêret, Cenabum, oppidum Carnutum, proficiscitur; qui, tum primum adlato nuntio de oppugnatione Vellaunoduni, cum longius eam rem ductum iri existimarent, praesidium Cenabi tuendi causa, quod eo mitterent, comparabant. Huc biduo Caesar pervenit. Castris ante oppidum positis, diei tempore exclusus, in posterum (diem) oppugnationem differt et, quod oppidum Cenabum pons fluminis Ligeris contingebat, veritus ne noctu incolae ex oppido profugerent, duas legiones in armis excubare iubet.
- Latino
- Maiorum Lingua C
- Versioni dai Libri di Esercizi
