Condita civitate, quam ex nomine suo Romam vocavit, haec fere egit. Multitudinem finitimorum in civitatem recepit, centum ex senioribus legit, quorum consilio omnia ageret, quos senatores nominavit propter senectutem. Tum, cum uxores ipse et populus suus non haberent, invitavit ad spectaculum ludorum vicinas urbi Romae nationes atque earum virgines rapuit. Quam ob iniuriam commotis bellis, Caeninenses vicit, Antemnates, Crustominos, Sabinos, Fidenates, Veientes. Haec omnia oppida urbem cingunt. Denique anno regni tricesimo septimo, cum Romulus exercitum in Campo Martium recenseret, orta est subito tempestas et ille e civium conspectu evanuit. Cum nemo eum amplius vidisset, omnes regem ad deos ascendisse crediderunt et ita consecratus est. Deinde Romae per quinos dies senatores imperaverunt et, his regnantibus, annus unus completus est.
- Latino
- Maiorum Lingua B
- Versioni dai Libri di Esercizi
