Cum Themistocles minus esset probatus a parentibus quod et liberius vivebat et rem familiarem neglegebat a patre exheredatus est. Quae contumelia non fregit eum sed erexit. Nam cum iudicasset sine summa industria non posse eam exstingui totum se dedidit rei publicae diligentius amicis famaeque serviens. Multum in iudiciis privatis versabatur saepe in contionem populi prodibat; nulla res maior sine eo gerebatur. Ille persuasit populo ut ea pecunia quae ex metallis redibat classis centum navium aedificaretur. Qua celeriter effecta primum Corcyraeos fregit deinde maritimos praedones consectando mare tutum reddidit. In quo cum divitiis ornavit tum etiam peritissimos belli navalis fecit Athenienses. Id quantae saluti fuerit universae Graeciae bello cognitum est Persico.
- Latino
- Versioni di Marco Porcio Catone
- Cornelio Nepote
