Dignum memoratu est Lichae navis naufragium, in quo et nos implicati sumus. Dum verba facimus et piscibus vescimur, inhorruit mare, nubesque undique adductae obruerunt tenebris diem. Discurrunt nautae ad officia trepidantes, velaque tempestati subducunt. Sed iam vehementes fluctus ventus impulerat, et gubernator, captus pavore, vociferabatur: quo destinaret cursum? quamve spem in salute haberent? Ipse Lichas gubernaculo potitus est. Siciliam modo ventus dabat, saepissime Aquilo convertebat huc illuc obnoxiam ratem, et quod omnibus procellis periculosius erat, tam spissae repente tenebrae lucem suppresserant, ut ne proram quidem totam gubernator videret. Itaque pernicies postquam manifesta convaluit, Lichas trepidans ad me supinas porrigit manus et illum quidem vociferantem in mare ventus excussit, et infesto gurgite procella circumegit atque hausit. Non dubito quin Tryphaena, prope iam exanimata, eodem modo perisset, nisi fidelissimi rapuissent servi qui eam, scaphae impositam cum maxima sarcinarum parte, abduxerunt certissimae morti. At nos salvi fuimus et bona valetudine utimur.
- Latino
- Lingua Viva 2
- Versioni dai Libri di Esercizi
