Qui fructibus rusticis serviunt, in eorum vestibulis stabula, tabernae, in aedibus cryptae, horrea, apothecae ceteraque, quae ad fructus servandos magis quam ad elegantiae decorem idonea possunt esse exstruentur. Item feneratoribus et publicanis aedificia commodiora et speciosiora et ab insidiis tuta non deerunt, forensibus autem et disertis elegantiora et spatiosiora ad conventos excipiendos proderunt; nobilibus vero, qui honores magistratusque gerunt igiturque praestant officia civibus, aedificabuntur vestibula regalia et alta, atria et peristylia amplissima, longae porticus, silvae ambulationesque laxiores ad decorem eorum maiestatis; praeterea tales domus habebunt bibliothecas basilicasque cum magnificentia publicis aedificiis simili, quod in iis saepius et publica consilia et privata iudicia arbitriaque conficiuntur.
- Latino
- Lingua Viva 1
- Versioni dai Libri di Esercizi
