Nervii, Senones et Carnutes, ferae indomitaeque Gallorum nationes, societatem cum Germanis fecerunt et seditionem ac discordiam tota Gallia concitare coeperunt. Itaque extrema hieme Caesar ex hibernis legiones eduxit et de improviso in fines Nerviorum contendit, magnum pecoris atque hominum numerum cepit, vicos incendit, agros vastavit. Nervii in deditionem venerunt atque obsides Romanis dederunt. Caesar magnam praedam militibus suis concessit et rursus in hiberna legiones reduxit. Primo vere Caesar concilium totius Galliae indixit, sed Senones et Carnutes non convenerunt. Tum cum legionibus ad Senones perrexit et magnis itineribus in eorum fines pervenit. Senones statim legatos deprecandi causa ad Romanos miserunt et libenter Caesar dedit veniam excusationemque accepit. Carnutes quoque legatos obsidesque miserunt atque idem responsum rettulërunt. Itaque Caesar celeriter magnum negotium confecit et totam Galliam rursus pacavit.
- Latino
- Maiorum Lingua A
- Versioni dai Libri di Esercizi
